ഫെഡറല്* ബാങ്ക് കേരളത്തിന് നഷ്ടമാകുമോ ശ്യ

കേരളത്തിന്റെ അഭിമാനമായ ഫെഡറല്* ബാങ്ക് പടര്*ന്ന് പന്തലിച്ച് കേരളത്തിന്റെ ദേശീയ ബാങ്കായി മാറുമോ? അതോ കുറച്ചു വര്*ഷങ്ങള്*ക്കുള്ളില്* ഏതെങ്കിലും പുതുതലമുറ ബാങ്കിലോ വിദേശ ബാങ്കിലോ പൊതുമേഖലാ ബാങ്കിലോ ലയിച്ച് ഇല്ലാതാകുമോ? ബാങ്കിംഗ് വൃത്തങ്ങളും ജീവനക്കാരും മാത്രമല്ല കേരളത്തിലെ സാധാരണക്കാരും ആശയോടെ അഥവാ ആശങ്കയോടെ ഉറ്റുനോക്കുകയാണ്. ശക്തമായ ഓഹരി പങ്കാളിത്തമുള്ള ഒരു പ്രമോട്ടര്* ഗ്രൂപ്പ് ഇല്ലെന്നിരിക്കെ, ബാങ്കിന്റെ ഭാവിയുടെ ചുക്കാന്* പിടിക്കുന്നത് ഈയിടെ മൂന്നു വര്*ഷത്തേക്കു കൂടി കാലാവധി നീട്ടിക്കിട്ടിയ മാനേജിംഗ് ഡയറക്റ്ററും സി.ഇ.ഒയുമായ ശ്യാം ശ്രീനിവാസനാണ്.

ഫെഡറല്* ബാങ്ക് വീണ്ടും വാര്*ത്തകളില്* സ്ഥാനം പിടിച്ചിരിക്കുകയാണ്. ഇതിന് പ്രധാന കാരണം വിദേശ മൂലധനം 49ല്* നിന്ന് 74 ശതമാനമായി വര്*ധിപ്പിക്കാന്* ബാങ്ക് നല്*കിയ അപേക്ഷയ്ക്ക് വിദേശ നിക്ഷേപ പ്രോല്*സാഹന ബോര്*ഡ് ഈയിടെ അനുമതി നല്*കിയതാണ്. അതിനെതിരെ ബാങ്ക് ജീവനക്കാര്* പ്രതിഷേധവും പ്രകടനങ്ങളുമൊക്കെയായി രംഗത്തെത്തിയതോടെ ബാങ്ക് വീണ്ടും ശ്രദ്ധാകേന്ദ്രമായി മാറി. ഒപ്പം, ഇത് ബാങ്കിന്റെ പ്രവര്*ത്തനത്തെക്കുറിച്ചും മാനേജ്*മെന്റിന്റെ പ്രവര്*ത്തനശൈലിയെക്കുറിച്ചും ചര്*ച്ചകള്*ക്കും വിശകലനങ്ങള്*ക്കും തുടക്കമിട്ടിരിക്കുകയാണ്.

ഫെഡറല്* ബാങ്കിലെ വിദേശ മൂലധന പരിധി 74 ശതമാനമായി വര്*ധിപ്പിക്കാനുള്ള അനുമതിക്കു പുറമെ അടുത്ത കാലത്തുണ്ടായ ചില സംഭവവികാസങ്ങള്* ബാങ്കിന്റെ ഭാവിയെ സംബന്ധിച്ച് ദൂരവ്യാപകമായ ഫലങ്ങള്* ഉളവാക്കാന്* പര്യാപ്തമാണ്. ഇവയില്* പ്രധാനമായവ:

► വിദേശ ബാങ്കുകള്*ക്ക് ഇന്ത്യയിലേക്ക് കടന്നുവന്ന് പ്രവര്*ത്തനം വ്യാപിപ്പിക്കാന്* അനുകൂലമായ നടപടികള്* കൈക്കൊള്ളുമെന്ന റിസര്*വ് ബാങ്ക് ഗവര്*ണര്* രഘുറാം രാജന്റെ പ്രസ്താവന ഇന്ത്യയിലെ ചെറുകിട ബാങ്കുകള്* ഏറ്റെടുക്കപ്പെടാനുള്ള സാധ്യതകള്* ഉയര്*ത്തുന്നു.

► പ്രമുഖ വിദേശ ഇന്ത്യന്* വ്യവസായിയായ എം.എ യൂസഫലി കേരളത്തിലെ മൂന്നു ബാങ്കുകളുടെയും അഞ്ച് ശതമാനത്തോളം ഓഹരികള്* വാങ്ങിയത്.

► വിവിധ കാരണങ്ങളാല്* പ്രതീക്ഷയ്*ക്കൊത്ത് ഉയരാത്ത ബാങ്കിന്റെ പ്രകടനം.

► പുതിയ ബാങ്കിംഗ് ലൈസന്*സ് കരസ്ഥമാക്കി പെട്ടെന്ന് വളരുക എന്ന ലക്ഷ്യത്തോടെ വരുന്ന വലിയ ബിസിനസ് ഗ്രൂപ്പുകളുടെ
ബാങ്കുകള്*.

► ബാങ്കിന്റെ ഡയറക്റ്റര്* ബോര്*ഡില്* ഒന്നൊന്നായി ഇല്ലാതായിക്കൊണ്ടിരിക്കുന്ന മലയാളി സാന്നിധ്യം.

► ബാങ്കിന്റെ നയങ്ങളില്* വിയോജിച്ച് ഡയറക്റ്റര്* ബോര്*ഡില്* നിന്ന് മുന്* യൂണിയന്* ബാങ്ക് ചെയര്*മാനും പ്രശസ്ത ബാങ്കറുമായ ഡോ. കെ.ചെറിയാന്* വര്*ഗീസും മുന്* റിസര്*വ് ബാങ്ക് ഉദ്യോഗസ്ഥനും സെബി ഡയറക്റ്ററുമായിരുന്ന ഡോ. ടി.സി നായരും രാജിവെച്ചൊഴിഞ്ഞത്.

► ബാങ്കിന്റെ ഇപ്പോഴത്തെ പോക്കില്* അസംതൃപ്തരായ ജീവനക്കാരുടെ സംഘടനകള്*.

മേല്*പ്പറഞ്ഞവയെല്ലാം ബാങ്കിന്റെ ഭാവിയെക്കുറിച്ച് സൂചന നല്*കുന്ന ചൂണ്ടുപലകകളാണ്. ഈ സാഹചര്യത്തിലാണ് ബാങ്കിന്റെ ഭാവിയെ സംബന്ധിച്ച് ശ്യാം ശ്രീനിവാസന്റെ റോള്* നിര്*ണായകമാകുന്നത്.

Tags: federal bank, banking, union bank

ബാങ്ക് എല്ലാ ഭാഗത്തുനിന്നും വെല്ലുവിളികള്* നേരിട്ടുകൊണ്ടിരിക്കുന്ന കാലഘട്ടമാണിത്. രാജ്യത്തെ മോശം സാമ്പത്തിക കാലാവസ്ഥയും ബിസിനസ് മേഖലകളിലെ മുരടിപ്പും വായ്പാ ബിസിനസിനെ പ്രതികൂലമായി ബാധിക്കുന്നു. കിട്ടാക്കടങ്ങള്* വര്*ധിക്കുന്നു. വളര്*ച്ചാ സാധ്യതകള്*ക്ക് മങ്ങലേല്*ക്കുന്നു. ഇതിനിടെ വലിയൊരു വിഭാഗം ജീവനക്കാര്* ബാങ്കിന്റെ നീക്കങ്ങളില്* അസംതൃപ്തരുമാണ്. കേരളത്തിലും ദേശീയതലത്തിലുമുള്ള മറ്റ് ബാങ്കുകളില്* നിന്നുള്ള മല്*സരവും വര്*ധിക്കുകയാണ്. റിസര്*വ് ബാങ്കാകട്ടെ നിയന്ത്രണങ്ങള്* കൂടുതല്* ശക്തമാക്കുകയും ചെയ്യുന്നു.

ശക്തമായ എതിര്*പ്പ്
ശ്യാം ശ്രീനിവാസന്* നേരിടുന്ന ഏറ്റവും വലിയ വെല്ലുവിളി സ്വന്തം തട്ടകത്തില്* നിന്നു തന്നെയാണ്. വിദേശ മൂലധനം ഉയര്*ത്താനുള്ള നീക്കത്തെ ശക്തമായി എതിര്*ക്കുന്ന ജീവനക്കാരുടെ സംഘടനകള്* കഴിഞ്ഞ കുറെ നാളുകളായി ബാങ്കിന്റെ പ്രവര്*ത്തനശൈലിയില്* അസംതൃപ്തിയും ആശങ്കയും പ്രകടിപ്പിക്കുന്നുണ്ട്.
തങ്ങളുടെ സംഘടന നേരത്തെതന്നെ ബാങ്കിലെ വിദേശ മൂലധന പരിധി ഉയര്*ത്തുന്നതിനോട് കടുത്ത എതിര്*പ്പ് പ്രകടിപ്പിച്ചിരുന്നുവെന്ന് ഫെഡറല്* ബാങ്ക് സ്റ്റാഫ് യൂണിയന്* ജനറല്* സെക്രട്ടറി ഷാജു ആന്റണി ചൂണ്ടിക്കാട്ടുന്നു. ശക്തമായ അടിത്തറയുള്ള ബാങ്കിന്റെ വളര്*ച്ചയ്ക്ക് വിദേശ മൂലധനമുണ്ടെങ്കിലേ മതിയാകൂ എന്ന നിലപാട് അപഹാസ്യമാണ്. ഇതിന്റെയെല്ലാം അടിസ്ഥാനകാരണം ബാങ്കിംഗിനെ ലാഭമുണ്ടാക്കാനുള്ള 'വെറും' ബിസിനസായിക്കാണുകയും പാശ്ചാത്യരാജ്യങ്ങള്* പിന്തുടര്*ന്ന നയങ്ങള്* അനുകരിക്കുകയും ചെയ്യുന്ന എന്*.ഡി.എ, യു.പി.എ ഗവണ്*മെന്റുകളുടെ നിലപാടുകളാണെന്നും ഷാജു അഭിപ്രായപ്പെടുന്നു.

എന്നാല്* വിദേശ മൂലധനം വര്*ധിപ്പിക്കുന്നതില്* അസ്വാഭാവികമായി യാതൊന്നുമില്ലെന്നാണ് മാനേജ്*മെന്റിന്റെ നിലപാട്. ഇതില്* പുതുമയൊന്നുമില്ലെന്നും 2006ല്* ബാങ്കിന്റെ ഓഹരി ഉടമകള്* ഇക്കാര്യം അംഗീകരിച്ചതാണെന്നും ശ്യാം ശ്രീനിവാസന്* 'ധന'ത്തോട് വ്യക്തമാക്കി.

''ഞങ്ങള്* എപ്പോഴും വ്യക്തമാക്കിയിട്ടുള്ളതുപോലെ ബാങ്ക് ഊന്നല്* നല്*കുന്നത് ഗുണമേന്മയ്ക്കും സ്ഥിരതയാര്*ന്ന പ്രവര്*ത്തനത്തിനും സ്വാഭാവിക വളര്*ച്ചയ്ക്കുമാണ്. ലയനത്തിനോ ഏറ്റെടുക്കലിനോ ഉള്ള സാധ്യതകളൊന്നും ഞങ്ങളുടെ റഡാറില്* ഇപ്പോഴില്ല,'' അദ്ദേഹം പറഞ്ഞു.

എന്നാല്* ഭാവിയില്* ബാങ്കിന്റെ നിയന്ത്രണം കേരളത്തിനു പുറത്തുള്ളവരുടെ കൈകളിലേക്ക് പൂര്*ണമായി എത്തിച്ചേരുന്നതിന്റെ തുടക്കം മാത്രമായിട്ടാണ് ബാങ്കിലെ ജീവനക്കാരുടെ സംഘടനകള്* ഇതിനെ കാണുന്നത്. 2006 ലേതിനേക്കാള്* സ്ഥിതിഗതികള്* വളരെയേറെ മാറിയിട്ടുണ്ടെന്ന് അവര്* ചൂണ്ടിക്കാട്ടുന്നു. ബാങ്കിന്റെ നേതൃനിരയിലെ മലയാളി സാന്നിധ്യം ഇപ്പോള്*തന്നെ വളരെയേറെ കുറഞ്ഞിട്ടുണ്ട്.

റിസര്*വ് ബാങ്ക് നയങ്ങള്* ചെറു ബാങ്കുകളുടെ ഏറ്റെടുക്കലിനെ പ്രോല്*സാഹിപ്പിക്കുന്ന വിധത്തില്* മാറുകയാണ്. മാത്രമല്ല, ബാങ്കിന്റെ തലപ്പത്തിരിക്കുന്നവര്*ക്ക് പ്രൊഫഷണല്* താല്*പ്പര്യങ്ങള്*ക്കപ്പുറം ബാങ്കുമായി വൈകാരികമായി ബന്ധമുണ്ടെന്ന് കരുതാന്* വയ്യെന്നും സംഘടനാ നേതാക്കള്* ചൂണ്ടിക്കാട്ടുന്നു.

മുമ്പ് ഐസിഐസിഐ ബാങ്ക് ഫെഡറല്* ബാങ്കില്* ഓഹരി പങ്കാളിത്തം നേടിയപ്പോള്* ബാങ്ക് ഏറ്റെടുക്കപ്പെടാനുള്ള സാധ്യതകളെക്കുറിച്ച് 'ധന'മുള്*പ്പടെ പലരും ആശങ്ക പ്രകടിപ്പിച്ചിരുന്നു. അന്ന് മാനേജ്*മെന്റ് അതിനെ പാടെ തള്ളിക്കളഞ്ഞെങ്കിലും പിന്നീട് ബാങ്കിന്റെ ഒരു മുന്* ചെയര്*മാന്* തന്നെ ഐസിഐസിഐ ബാങ്ക് പിന്*വാതിലിലൂടെ ബാങ്കിനെ ഏറ്റെടുക്കാന്* ശ്രമം നടത്തുന്നുവെന്ന് ആരോപിച്ചിരുന്നു. ജനങ്ങളുടെയും ജീവനക്കാരുടെയുമെല്ലാം പിന്തുണയോടെ അതിനെ ചെറുത്ത് തോല്*പ്പിക്കുകയായിരുന്നു. മാനേജ്*മെന്റുമായി അടുപ്പം പുലര്*ത്തുന്ന ഏതെങ്കിലുമൊരു ഗ്രൂപ്പ് തുനിഞ്ഞിറങ്ങിയാല്* ഓഹരികള്* കരസ്ഥമാക്കി ബാങ്കിന്റെ നിയന്ത്രണം കൈയടക്കാം എന്നതാണ് ഇപ്പോഴത്തെയും സ്ഥിതി.

അതേസമയം പരമ്പരാഗത ബാങ്കിംഗ് രംഗത്ത് ശക്തമായ സാന്നിധ്യവും അടിത്തറയുമുള്ള ബാങ്കിനെ പെട്ടെന്ന് പുതുതലമുറ ബാങ്കാക്കി മാറ്റാനുള്ള ശ്രമം ബാങ്കിന്റെ അടിത്തറതന്നെ തകര്*ക്കുമെന്നാണ് ബാങ്കിലെ ഓഫീസര്*മാരുടെ ശക്തമായ സംഘടന - ഫെഡറല്* ബാങ്ക് ഓഫീസേഴ്*സ് അസോസിയേഷന്* - ഭയക്കുന്നത്; മുമ്പ് ധനലക്ഷ്മി ബാങ്കില്* തിരക്കിട്ട് നടപ്പാക്കിയ സമാനരീതിയിലുള്ള പരീക്ഷണം പരാജയപ്പെട്ട സാഹചര്യത്തില്* പ്രത്യേകിച്ചും.

പരിഗണന നല്*കുന്നില്ല

''ബാങ്കിനോട് ഏറ്റവും ആത്മാര്*ത്ഥത പുലര്*ത്തുന്ന ജീവനക്കാരാണ് ഫെഡറല്* ബാങ്കിന്റെ കരുത്ത്. അവരെ വിശ്വാസത്തിലെടുക്കാതെ പരിഷ്*കരണ നടപടികളുമായി ബാങ്ക് മുന്നോട്ടു പോകുന്നു എന്നതാണ് നിര്*ഭാഗ്യകരം,'' ഈയിടെ വിരമിക്കും വരെ ഫെഡറല്* ബാങ്ക് ഓഫീസേഴ്*സ് അസോസിയേഷന്റെ അനിഷേധ്യനായ നേതാവായിരുന്ന പി.വി മാത്യു ചൂണ്ടിക്കാട്ടുന്നു.

ഒരു പ്രമോട്ടര്* ഗ്രൂപ്പിന്റെ പിന്*ബലമില്ലാത്ത ഫെഡറല്* ബാങ്കില്* ഏറ്റവും കൂടുതല്* ഉടമസ്ഥതാ ബോധത്തോടെ പ്രവര്*ത്തിക്കുന്നത് തങ്ങളാണെന്ന് ബാങ്ക് ജീവനക്കാര്* പറയുന്നു. ''ഞങ്ങളുടെ ജീവിതം ബാങ്കുമായി അഭേദ്യമായി ബന്ധപ്പെട്ടിരിക്കുന്നു. ജീവിതത്തിന്റെ ഏറെ സമയവും ചെലവഴിക്കുന്ന ബാങ്കിന്റെ പുരോഗതി തങ്ങളുടെ ജീവിത ലക്ഷ്യമായിട്ടാണ് ജീവനക്കാര്* കാണുന്നത്,'' എഫ്.ബി.ഒ.എയുടെ പുതിയ പ്രസിഡന്റ് പി.അനിത പറയുന്നു.

''ബാങ്കുമായി ഒരാത്മബന്ധം ഉള്ളതുകൊണ്ടാണ് ബാങ്കിന്റെ പോക്കിനെക്കുറിച്ച് ഞങ്ങള്* ആശങ്കകള്* ഉയര്*ത്തുന്നതും പഠനം നടത്തി നിര്*ദേശങ്ങള്* സമര്*പ്പിച്ചതും. എന്നാല്* ഞങ്ങള്* ഈ വര്*ഷം ആദ്യം സമര്*പ്പിച്ച നിര്*ദേശങ്ങള്* പരിഗണിക്കാന്* പോലും നേതൃത്വം തയാറായില്ല എന്നത് അത്യന്തം ഖേദകരമാണ്,'' എഫ്.ബി.ഒ.എയുടെ ജനറല്* സെക്രട്ടറി പോള്* മുണ്ടാടന്* വ്യക്തമാക്കുന്നു.

ശാഖകളില്* നിന്നും വായ്പകള്* അനുവദിക്കാനുള്ള അധികാരം എടുത്തുമാറ്റി ക്രെഡിറ്റ് ഹബ് മാതൃക പിന്തുടരാന്* തുടങ്ങിയതോടെ വര്*ഷങ്ങളായി കൂടെ നിന്നിരുന്ന ഉപഭേക്താക്കളെ പലരെയും നഷ്ടപ്പെടാനിടയായെന്നും ജീവനക്കാരുടെ സംഘടനകള്* ചൂണ്ടിക്കാട്ടുന്നു.

ഉയരുന്ന കിട്ടാക്കടങ്ങള്* തിരിച്ചുപിടിക്കാനുള്ള നടപടികള്* വേണ്ടത്ര ശക്തമല്ലെന്ന ആരോപണവും ഓഫീസേഴ്*സ് അസോസിയേഷന്* ഉയര്*ത്തുന്നുണ്ട്. ''അസറ്റ് റീ കണ്*സ്ട്രക്ഷന്* കമ്പനികള്*ക്ക് ഇവ കൈമാറുന്നതിലൂടെ ബാലന്*സ് ഷീറ്റ് കൂടുതല്* മെച്ചപ്പെടുത്താമെന്ന ഗുണമുണ്ട്. എന്നാല്* ബാങ്കിന്റെ ആരോഗ്യത്തിന് എത്രമാത്രം ഇത് ഉപകരിക്കും? ബാങ്കിന്റെ തന്നെ സമര്*ത്ഥരായ ജീവനക്കാരെ വിന്യസിച്ച് കടങ്ങള്* തിരിച്ചുപിടിക്കാനുള്ള അവസാന ശ്രമവും നടത്തിയ ശേഷമായിരിക്കണമിത്. എന്നാല്* ഇക്കാര്യത്തില്* വേണ്ടത്ര ശുഷ്*കാന്തി കാണിക്കുന്നില്ല,'' ബാങ്കിന്റെ ഒരു മുതിര്*ന്ന ജീവനക്കാരന്* ചൂണ്ടിക്കാട്ടുന്നു.

എന്നാല്* ശ്യാം ശ്രീനിവാസന്* ബാങ്കിന്റെ പ്രകടനത്തെക്കുറിച്ച് തികഞ്ഞ ശുഭാപ്തി വിശ്വാസം പ്രകടിപ്പിക്കുന്നു. ''പൊതുവില്* വിപണി സാഹചര്യങ്ങള്* പ്രതികൂലമായിരുന്നിട്ടും കഴിഞ്ഞ ഒരു വര്*ഷത്തിനുള്ളില്* ബാങ്കിന്റെ കിട്ടാക്കടങ്ങള്* (ഗ്രോസ് എന്*.പി.എ) 3.83 ശതമാനത്തില്* നിന്ന് 3.39 ശതമാനമായി കുറയ്ക്കാന്* കഴിഞ്ഞിട്ടുണ്ട്. എല്ലാ സുപ്രധാന പ്രവര്*ത്തന മേഖലകളിലും പുരോഗതി കൈവരിക്കാന്* കഴിഞ്ഞ ചുരുക്കം ചില ബാങ്കുകളിലൊന്നാണ് ഫെഡറല്* ബാങ്ക്,'' അദ്ദേഹം ചൂണ്ടിക്കാട്ടി.

വ്യത്യസ്ത സമീപനം

നഷ്ടസാധ്യത കാര്യക്ഷമമായി കൈകാര്യം ചെയ്യാനുള്ള നയങ്ങളിലും നടപടിക്രമങ്ങളിലും ഇടപാടുകാര്*ക്ക് മെച്ചപ്പെട്ട സേവനം നല്*കാന്* ജീവനക്കാരെ പ്രാപ്തരാക്കുന്നതിലും തങ്ങള്* പ്രത്യേകം ഊന്നല്* കൊടുക്കുന്നുണ്ടെന്നും അദ്ദേഹം കൂട്ടിച്ചേര്*ത്തു.

എന്നാല്* വായ്പാ വിതരണത്തിലും മറ്റും പുതുതലമുറ ബാങ്കുകളിലേതു പോലെ അധികാരം കേന്ദ്രീകരിക്കുന്നതിലൂടെയേ കാര്യക്ഷമത വര്*ധിപ്പിക്കുവാന്* കഴിയൂ എന്ന നയത്തോട് യോജിക്കാന്* കഴിയുകയില്ലെന്ന് സ്റ്റാഫ് യൂണിയന്* ജനറല്* സെക്രട്ടറി ഷാജു ആന്റണി പറയുന്നു. മികച്ച രീതിയില്* പരമ്പരാഗത ബാങ്കിംഗ് ശൈലി പിന്തുടര്*ന്നാലും ശ്രദ്ധേയമായ നേട്ടങ്ങള്* കൈവരിക്കാമെന്നതിന് ഉദാഹരണമാണ് സൗത്ത് ഇന്ത്യന്* ബാങ്കിന്റെ പ്രകടനം സൂചിപ്പിക്കുന്നതെന്നും ഷാജു പറഞ്ഞു. തല്*ക്കാലം വിദേശ മൂലധനം 49 ശതമാനത്തില്* കൂടുതല്* വേണ്ട എന്ന് സൗത്ത് ഇന്ത്യന്* ബാങ്കിന്റെ ബോര്*ഡ് തീരുമാനമെടുത്തത് സമീപനത്തിലെ വ്യത്യസ്തതയാണ് വ്യക്തമാക്കുന്നതെന്നും ഷാജു ചൂണ്ടിക്കാട്ടി.

എന്നാല്* ബാങ്കിന്റെ പ്രവര്*ത്തനങ്ങളില്* പൊതുവെ ജീവനക്കാരുടെ സംഘടനകളുടെ സ്വാധീനം കുറഞ്ഞുകൊണ്ടിരിക്കുകയാണെന്ന അഭിപ്രായവും ഉയരുന്നുണ്ട്. തങ്ങളുമായി നേരിട്ടു ബന്ധമുള്ള കാര്യങ്ങളല്ലാതെ ബാങ്കിന്റെ നയപരമായ കാര്യങ്ങളില്* ജീവനക്കാര്* ഇടപെടേണ്ടതില്ലെന്ന് ഒരു മുന്* ചെയര്*മാന്* എടുത്തു പറഞ്ഞത് ഈ സാഹചര്യത്തിലായിരുന്നു.

പ്രഗല്*ഭരായ പലരും വിരമിക്കുമ്പോള്* ശക്തമായ ഒരു രണ്ടാംനിര നേതൃത്വം വളര്*ത്തിയെടുക്കുന്നതില്* വേണ്ടത്ര വിജയിച്ചില്ല എന്നതും ബാങ്കിനെ സംബന്ധിച്ചിടത്തോളം വെല്ലുവിളിയാണെന്ന് ചില നിരീക്ഷകര്* അഭിപ്രായപ്പെടുന്നു. വിദേശ ബാങ്കായ സ്റ്റാന്*ഡേര്*ഡ് ചാര്*ട്ടേഡ് ബാങ്കിന്റെ കണ്*സ്യൂമര്* ബാങ്കിംഗ് ഡിവിഷനിലെ അനുഭവസമ്പത്തുമായി ഫെഡറല്* ബാങ്കിന്റെ തലപ്പത്തേക്ക് എത്തിയ മാനേജിംഗ് ഡയറക്റ്ററുടെ പരിമിതമായ പരിചയം സങ്കീര്*ണമായ ബാങ്കിംഗ് മേഖലയിലെ മുന്നേറ്റത്തിന് ഒരു വിലങ്ങുതടിയായി കാണുന്നവരുണ്ട്; ശക്തമായ ഗ്രാമീണ അടിത്തറയുള്ള ഫെഡറല്* ബാങ്കിന്റെ കാര്യത്തില്* പ്രത്യേകിച്ചും. പഴയ തലമുറ ബാങ്കുകളില്* ബ്രാഞ്ച്, റീജിയണ്* തലം മുതല്* പ്രവര്*ത്തിച്ച് നേതൃപദവിയിലേക്കെത്തുന്നവരുടെ അനുഭവസമ്പത്ത് വിദേശ ബാങ്കിലെ പ്രവര്*ത്തനം നേടിക്കൊടുക്കുകയില്ലെന്ന് ബാങ്കിംഗ് വൃത്തങ്ങള്* ചൂണ്ടിക്കാട്ടുന്നു.

'ബാങ്കിനെ അറിയണം'

ശ്യാം ശ്രീനിവാസനെക്കുറിച്ച് ബാങ്കിന്റെ ഒരു മുന്* ജീവനക്കാരന്* പറയുന്നതിങ്ങനെ: ''അദ്ദേഹം ഇനിയും ഫെഡറല്* ബാങ്കിന്റെ ആത്മാവിനെ കണ്ടെത്തിയിട്ടില്ല. അതിന് കഴിയാത്തിടത്തോളം കാലം ബാങ്കിന്റെ ശക്തമായ മുന്നേറ്റം യാഥാര്*ത്ഥ്യമാക്കുവാന്* അദ്ദേഹത്തിന് കഴിയില്ല.'' ഫെഡറല്* ബാങ്കിന്റെ ഒരു പ്രത്യേകത ബാങ്കിന്റെ മുന്നേറ്റത്തില്* ബദ്ധശ്രദ്ധരായ ജീവനക്കാരുടെ സാന്നിധ്യമാണ്. ബാങ്ക് ഓഫീസര്*മാരുടെ സംഘടന മുന്*കയ്യെടുത്ത് പഠനം നടത്തി തയാറാക്കിയ ‘Towards a better Federal Bank’ എന്ന റിപ്പോര്*ട്ട് മാനേജ്*മെന്റിന് സമര്*പ്പിച്ചിരുന്നു. എന്നാല്* ബാങ്കിന്റെ പ്രതിച്ഛായ ഉയര്*ത്താനും മല്*സരം കൂടിവരുന്ന സാഹചര്യത്തില്* കൂടുതല്* ശ്രദ്ധയും ബിസിനസും നേടിയെടുക്കാനും ആവശ്യമായ ബ്രാന്*ഡിംഗ്, വിപണന നടപടികള്* സ്വീകരിക്കാന്* വിമുഖത കാണിക്കുന്നത് ബാങ്കിന് ദോഷം ചെയ്യുന്നുണ്ടെന്ന് പ്രമുഖനായ ഒരു ബ്രാന്*ഡിംഗ് വിദഗ്ധന്* ചൂണ്ടിക്കാട്ടുന്നു.

ഫെഡറല്* ബാങ്കിന്റെ പേരിനോടൊപ്പമുണ്ടായിരുന്ന ലോഗോ കുറെ നാളുകള്*ക്കു മുമ്പ് അപ്രത്യക്ഷമായിരുന്നു. തങ്ങള്* ഇക്കാര്യം പലതവണ മാനേജ്*മെന്റിന്റെ ശ്രദ്ധയില്* പെടുത്തിയെങ്കിലും പഴയ ലോഗോ പുനസ്ഥാപിക്കുന്നതിനോ പുതിയതൊന്ന് സ്വീകരിക്കുന്നതിനോ വര്*ഷങ്ങളായി നടപടിയൊന്നും എടുക്കാത്തതില്* ദുരൂഹതയുണ്ടെന്ന് ജീവനക്കാര്* ആരോപിക്കുന്നു. ബാങ്കിന്റെ ഐഡന്റിറ്റി കാത്തുസൂക്ഷിക്കുന്നതിലെ താല്*പ്പര്യമില്ലായ്മ മനൂര്*വമാണെന്ന് കരുതുന്നവരുമുണ്ട്.

എന്നാല്* വിപണിയിലെ ആവശ്യങ്ങള്*ക്കൊത്ത് ഫെഡറല്* ബാങ്ക് നിരന്തരം മാറ്റങ്ങള്*ക്ക് വിധേയമായിക്കൊണ്ടിരിക്കുകയാണെന്നും ബ്രാന്*ഡിനെക്കുറിച്ചും അതിനെ വിപണിയില്* എങ്ങനെ പ്രതിഷ്ഠിക്കാമെന്നതിനെക്കുറിച്ചും അവലോകനം നടത്തിക്കൊണ്ടിരിക്കുകയാണെന്നും ശ്യാം ശ്രീനിവാസന്* 'ധന'ത്തോട് വ്യക്തമാക്കി. ''ഞങ്ങളുടെ പേര് തന്നെയാണ് ഞങ്ങളുടെ ലോഗോ. ബാങ്കിന്റെ തത്വശാസ്ത്രവും ഇപ്പോഴത്തെയും ഭാവിയിലെയും ജീവനക്കാരുടെയും ഇടപാടുകാരുടെയും വികാരങ്ങളും പ്രതിഫലിക്കുന്ന എന്തെങ്കിലുമൊന്ന് കാലക്രമേണ ഞങ്ങള്* കണ്ടെത്തും,'' അദ്ദേഹം പറഞ്ഞു. അതേസമയം കേരളത്തിലെ ബാങ്കുകളുള്*പ്പടെ മറ്റു പല ബാങ്കുകളും ബ്രാന്*ഡിംഗിന് പ്രാധാന്യം കൊടുത്ത് തങ്ങളുടെ നില ശക്തമാക്കുകയാണെന്ന് ജീവനക്കാരുടെ സംഘടനകള്* ചൂണ്ടിക്കാട്ടുന്നു. എന്തൊക്കെയാണെങ്കിലും വരും മാസങ്ങള്* ഫെഡറല്* ബാങ്കിനെയും ശ്യാം ശ്രീനിവാസനെയും സംബന്ധിച്ചിടത്തോളം നിര്*ണായകമായിരിക്കും.

സ്വന്തം തട്ടകത്തിലെ പ്രതിഷേധങ്ങള്* അതിജീവിച്ചും സമ്പദ്*രംഗത്തെ വെല്ലുവിളികളെ നേരിട്ടും വളര്*ച്ചയുടെ പുതിയ തലത്തിലേക്ക് ബാങ്കിനെ നയിക്കാന്* ശ്യാം ശ്രീനിവാസന് കഴിയുമോ എന്ന് ഏവരും ഉറ്റുനോക്കുന്നു. “Proud to be a federal’ (ഫെഡറല്* ബാങ്കുകാരനായിരിക്കുന്നതില്* അഭിമാനിക്കുന്നു) എന്ന സന്ദേശം തന്റെ കത്തുകളിലും മറ്റും ഉള്*ക്കൊള്ളിക്കാറുള്ള അദ്ദേഹം ബാങ്കിന്റെ ഐഡന്റിറ്റി നിലനിര്*ത്തി മുന്നോട്ടുപോകുമോ അതോ പുതിയ സംഭവവികാസങ്ങള്* ലയനത്തിലേക്ക് എത്തിച്ചേരുമോ എന്നത് ശ്യാം ശ്രീനിവാസന്റെ ദീര്*ഘവീക്ഷണം, അര്*പ്പണബോധം, നേതൃശേഷി എന്നിവയെയെല്ലാം ആശ്രയിച്ചിരിക്കുന്നു. ഏതായാലും ഒരു വര്*ഷത്തിനകം ബാങ്കിന്റെ ഭാവിയെക്കുറിച്ച് കൂടുതല്* വ്യക്തമായ ചിത്രം ലഭ്യമാകും.

പ്രത്യാഘാതങ്ങള്* ദൂരവ്യാപകം
കേരളത്തിന്റെ സ്വന്തം ബാങ്ക് എന്നറിയപ്പെടുന്ന ഫെഡറല്* ബാങ്ക് കൈവിട്ടുപോയാല്* കേരളത്തിന് അത് വന്* നഷ്ടമായിരിക്കും. നിരവധി മേഖലകളില്* അത് പ്രത്യാഘാതങ്ങളുണ്ടാക്കും.

ജോലി സാധ്യതകള്*: കേരളത്തിലെ ഗ്രാമങ്ങളില്* നിന്നും ചെറുപട്ടണങ്ങളില്* നിന്നുമുള്ളവരാണ് ഫെഡറല്* ബാങ്കിന്റെ ജീവനക്കാരില്* ഏറെയും. പതിനായിരത്തിലേറെ വരുന്ന ജീവനക്കാരില്* വലിയൊരു ശതമാനവും ഇപ്പോള്* മലയാളികളാണ്. എന്നാല്* ബാങ്കിന്റെ നിയന്ത്രണം കേരളത്തിന് വെളിയിലേക്ക് പോയാല്* ഈ ജോലി സാധ്യതകള്*ക്ക് മങ്ങലേല്*ക്കും.

ചെറുകിട വായ്പകള്*: ചെറുകിട വ്യാപാരികള്*, വ്യവസായികള്*, കര്*ഷകര്* എന്നിവരെല്ലാം വായ്പകള്*ക്കായി ആശ്രയിക്കുന്ന ബാങ്കാണ് ഫെഡറല്* ബാങ്ക്. എന്നാല്* പൂര്*ണമായി പുതുതലമുറ ബാങ്കിംഗ് രീതികളിലേക്ക് മാറുമ്പോള്* ബാങ്ക് ഊന്നല്* നല്*കുന്ന മേഖലകളിലും വ്യത്യാസം വരും. വന്*കിട കോര്*പ്പറേറ്റ് ഇടപാടുകാരെയും മറ്റും ലക്ഷ്യം വെക്കുമ്പോള്* ബാങ്കിന്റെ ബിസിനസ് ഭൂരിഭാഗവും കേരളത്തിന് വെളിയിലാകും.

ഡയറക്റ്റര്* ബോര്*ഡ്: ബോര്*ഡിലെ മലയാളി സാന്നിധ്യം വീണ്ടും ചുരുങ്ങും. ധനലക്ഷ്മി ബാങ്കിന്റെയും സിഎസ്ബിയുടെയും കാര്യത്തിലെന്നപോലെ കേരളത്തിന് വെളിയില്* നിന്നാകും നിയന്ത്രണം.

കേരള സ്ഥാപനങ്ങളുടെ നിക്ഷേപം: പള്ളികള്*, അമ്പലങ്ങള്*, വിദ്യാഭ്യാസ സ്ഥാപനങ്ങള്* എന്നിങ്ങനെ കേരളത്തിലെ നിരവധി സ്ഥാപനങ്ങളുടെ നിക്ഷേപം ഫെഡറല്* ബാങ്കിലുണ്ട്. മാനേജ്*മെന്റ് മാറിയാല്* ഇത് മറ്റ് ബാങ്കുകളിലേക്ക് തിരിയാന്* സാധ്യതയുണ്ട്.
ഉയരുന്ന ചെലവുകള്*: ബാങ്ക് ഇടപാടുകള്*ക്കുള്ള ഫീസ് വര്*ധിക്കാനുള്ള സാധ്യതയും കൂടുതലാണ്. ഇപ്പോള്*തന്നെ ബാങ്ക് പല ഇടപാടുകളുടെയും ചാര്*ജ് വര്*ധിപ്പിച്ചത് ഇടപാടുകാര്*ക്ക് ഭാരമാകുന്നുണ്ടെന്ന് ജീവനക്കാരുടെ സംഘടനകള്* ചൂണ്ടിക്കാട്ടുന്നുണ്ട്. ഭാവിയില്* ഇത് വന്*തോതില്* ഉയര്*ന്നേക്കും.

ജീവനക്കാരുടെ താല്*പ്പര്യങ്ങള്*: ബാങ്കിന്റെ നിയന്ത്രണം കേരളത്തിന് കൈവിട്ടുപോകുമ്പോള്* ഭാവിയില്* ജീവനക്കാരുടെ താല്*പ്പര്യങ്ങളും സംരക്ഷിക്കപ്പെടാതെ വരാം. മുമ്പത്തെ കൊച്ചിന്* ബാങ്കിന്റെയും ലോര്*ഡ് കൃഷ്ണ ബാങ്കിന്റെയും കാര്യത്തില്* മാത്രമല്ല ധനലക്ഷ്മി ബാങ്കില്* പോലും പ്രമോഷന്റെയും മറ്റ് ആനുകൂല്യങ്ങളുടെയും കാര്യത്തില്* പക്ഷപാതപരമായ സമീപനമാണുണ്ടായതെന്ന് പല യൂണിയന്* പ്രവര്*ത്തകരും ചൂണ്ടിക്കാട്ടുന്നുണ്ട്.

ഫെഡറല്* ബാങ്കിന്റെ ഉടമസ്ഥത കേരളത്തിന് കൈവിട്ടു പോകാതിരിക്കാന്* ഒരു ജനകീയ മുന്നേറ്റം ഉണ്ടാകേണ്ട സമയമായെന്ന് ജീവനക്കാരുടെ ഒരു വിഭാഗവും പേര് വെളിപ്പെടുത്താനാഗ്രഹിക്കാത്ത ചില പ്രമുഖരും അഭിപ്രായപ്പെടുന്നുണ്ട്.